Tour de France 3. dagleið - Upphitun

Klukkan 10:30, þann 7. júlí er eins gott að vera í sumarfríi því þá hefst þriðja dagleið Tour de France. Leiðin sem um ræðir liggur frá Saint-Malo til Nantes og eru hjólaðir 208 kólómetrar á frekar miklu sléttlendi.

Það ætti ekki að koma neinum á óvart þó gula treyjan myndi skipta um keppanda á morgun því á morgun er dagur sprettaranna og brautin allt öðruvísi heldur en hún hefur verið seinustu 2 daga.

Það verður því gaman að sjá hverjir verða þarna á toppnum á morgun. Hugsanlegt er að Cadel Evans sem spáð var titlinum í ár taki sig til og vinni fyrstu dagleiðina sína og einnig eru menn að tala um Kim Kirchen. Auðvitað væri skemmtilegast ef að Norðurlandabúinn og sgurvegari dagsins myndi skella sér í grænu treyjuna á morgun.

Eins og sjá má á sneiðmyndinni eru merkt inn græn S sem eru þeir staðir þar sem sprettararnir ættu að njóta sín best og jafnvel ná upp smá forystu.

Eftir þrælskemmtilega aðra dagleið þá er ekki úr vegi að horfa á lokasprettinn í þegar Thor Hushovd hirti sigurinn á lokametrunum.

Athugasemdir

[Ágúst Ásgeirsson, 7.7.2008 kl. 19:43]

Sæll Vilberg

Það var ólýsanlega gaman að fylgjast með túrnum í dag. Skellti mér ásamt nokkrum félögum til Calorguen, þorpsins þar sem Bernard Hinault býr. (Þangað ekki nema 27 km frá heimabæ mínum, Combourg, sem þú sérð á kortinu. Þar fóru kapparnir í gegn klukkan rúmlega 13 en þá var fjögurra manna hópurinn sem sleit sig lausan í byrjun með  7 mínútna forskot. Um 10-leytið, þremur stundum áður, var krökkt orðið af fólki í þorpinu og meðfram veginum gegnum það og langt í báðar áttir frá því.

Tæpum tveimur tímum áður en hjólreiðamennirnir bunuðu í gegn kom svonefndur "caravan" í gegn. Þar er um að ræða langa lest bíla og farartækja styrktarfyrirtækja túrsins og liðanna. - og kynningaraðila. Úr þeim var fleygt yfir mannskapinn kynningarefni sem meðal annars mátti setja utan á sig og ofan í sig. Svaka stemmning kringum það. Þessi uppákoma stóð í minnst 45 mínútur.

Í félagsheimili Calorguen hafði verið sett upp sýning um feril Hinault. Þar voru öll verðlaun hans, þvílíkt góss, en hann vann 286 keppnir á ferlinum. Mikið af ljósmyndum og treyjur sem hann vann hér og þar, m.a. í túrnum á sínum tíma.

Karlinn stoppaði síðan aðeins í þorpinu eftir ræsinguna í Saint Malo en svo varð hann að skella sér til Nantes til að afhenda verðlaun. Hann er hetja hér í Frakklandi, lifandi goðsögn. Í hjólatúrum okkar rennum við stundum gegnum þorpið en höfum ekki mætt kalli á hjólhestinum. Hann er nefnilega hættur búskap fyrir rúmu ári og tekinn til við að hjóla á ný, sér til ánægju og heilsubótar. Snaggaralegur og sprækur að sjá, 53 ára í ár.

Þetta var sem sagt eftirminnilegt í dag - og gríp fyrsta tækifæri sem aftur gefst til að upplifa stemmningu sem þessa.

[Ágúst Ásgeirsson, 7.7.2008 kl. 19:47]

. . . gleymdi því, að þetta var náttúrulega stórkostlegur dagur fyrir Frakka og franskar hjólreiðar. Minnsti knapinn í hópnum  vann dagleiðina, Samuel Dumoulin hjá Cofidis. Annar ungur knapi, Romain Feillu hjá Agritubel, tók gulu treyjuna. Reyndar verður erfitt fyrir hann að halda henni á morgun þegar keppt verður í kappi við klukkuna. Skiptir ekki máli, menn njóta lengi frægðar og álits með því að hafa skrýðst treyjunni.

[Vilberg Helgason, 8.7.2008 kl. 21:29]

Sæll Ágúst og þakka þér þessa frábæru lýsingu. Það eru forréttindi að fá að upplifa túrinn eins og þú gerðir þennan dag. Ég vona að túrinn í ár verði seinasti túrinn sem ég næ ekki að sjá á staðnum.

Það er óhjákvæmilegt að fara og prófa að upplifa þessa stemmingu. Stemmingin sem maður skynjar í gegnum sjónvarpsskjáinn er einstök að sjá. Það sem margir leggja á sig og hversu stór þáttur í keppninni eru merkingar á ökrum og götum á leiðinni. Og hversu nálægt áhorfendur fá að vera við keppendur er alveg frábært.

og enn og aftur takk kærlega fyrir þetta comment. Vildi að ég hefði verið þarna.